Letschtjohr homma uns jo iwwa Inhaltsschdoffe un aa iwwa
Mindeschthaltbarkeitsdatum vun so veschiedene Barraawa unnahall, des
hääßt nadierlich, womma uns bollidisch korrekt ausdrigge wolle, misst ich jo
saa „Barraawarinne un Barraawa“. Jetzat känne ma mol gugge, was sich do
so geduu hat im vegongne Johr, ob ́s bessa woor is odda schlimma un ob
neije Barrawarinne un Barraawa in moi Betrachdung mit uffgenumm honn
misse werre. Um ́s korz se mache: ́s hat e paar Barrawarinne un Barraawa
gebb, die wo ich mit uff die Aschamittwochsschälltabell gesetzt honn. Un heit
mach ich ́s mol sorum, dass ich mit de auswertsiche Barraawarinne un
Barraawa anfang un mich longsom awwa sicha Richdung unsa Bärmesäns
begebb.
Heit derf als erschdes de
Donald T. aus W.
soi Fett abkrieh, wobei „W“ net fa
Winzle odda Würselen schdeht, aa net fa Winschberch odda Weseleberch,
nää, des schdeht fa Washington. Der sell is jo selwat soi greeschda Fän,
dessentwää blätscht er sich jo aa imma selwat Beifall. Alla, des is jo schun e
Mortzleischdung fa denne, wonna mol unfallfrei ebbes saat, wo mehr wie 140
Zeiche long is. Do fiehlt er sich jo schun glei als GRÖPRAZ. Er hat aa
mittlaraweile e neiji Maßeinheit inschdalliert: De Abschdond zwische zwää
diplomadische Fettnäppcha hääßt jetzat „1 Trump“. Außadem hat er e
enscheidenda Oodääl on de Klimaveännerung, aa wonna ́s net zugebbt – er
is zu bleed dezu, des intellektuell se raffe, er männt nämlich Wetter = Klima
un er krieht net in de Knause, dasses do e klänna Unnaschied gebbt. Do
kumme ma jetzat schun zu soim Beitrach zu de Klimaveännerung. Fa soi dolli
Frisur – jeda Friseermääschda deet soi Lehrbuwe schwaade, wonn se äm so
e Frisur mache deede – brauch der alle Daa so viel Hoorschbräi, dassa mehr
Treibhausgas in die Atmosphäre jaat wie gonz Bärmesäns imme halwe Johr.

Alla, wonn änna soi Kopp mit so viel Hoorschbräi zubetoniert, isses kää
Wunna, wonn do nix in de Kopp ninnkummt. Imma wonn ich des Drombeldier
sieh, fallt ma der alde Schbruch in: „Aus dem Chaos hört ich eine Stimme: sei
froh und lächle, es könnte schlimmer kommen. Ich war froh und lächelte und
es kam schlimmer!“ Ich konn bloß hoffe, dass dem Brondschdifda un
Amokläufa bezeide es Hondwerk geleet werd, bevor die Welt in Schutt un
Äsch leit!
Kumme ma zum neechschde Harzkräma,
em Jong-Un K.s au P.
„P“ schdeht
in dem Fall net fa Peterschbersch odda Pirmasens. Was ma iwwrichens
uffgfall is: die Koreaner honn mit de Pälza im allgemoine un mit de
Bärmesänsa im schbezjelle viel gemoinsom. Die saan nämlich de Zunome aa
imma seerscht – wie bei uns aa. De Nome Kim is in Korea prakdisch so wie
bei uns „Müller“ odda „Maier“ odda „Schmidt“. Do deet de Kim Jong-Un bei
uns deet ich mol saa „de Miller Kevin-Malte“ hääße. Alladings macht ma bei
dem do Barraawa änns Ongscht: wonn die ihr Atomwaffe so exakt entwickle
un baue wie dem soi Frisur, donn hat ma werklich Grund fa Ongscht se honn.
Vielleicht kummt ihm jo doch noch die Erkenntnis, dass soi Volk net vun
Atomrakete satt werre konn.
Jetzat kumme ma zum moim gonz schbezjelle Freund:
de Recep E. aus A.
Hat die gonz Zeit die Bundesrepublik Deitschlond als Provinz vun de Türkei
betracht un war deshalb ziemlich schdingich, dass die net so gemach honn,
wie er des in Ankara feschtgeleet hat. Deshalb hadda so aarich mit uns
schälle misse. Un do issa so in Raasch kumm, dassa uns Nazis un so Zeich
gehääß hat. Des wollda jo eichentlich gar net, er wollt jo liewa unsa Geld un
dass ma all nunna mache in Urlaub un noch mäh Geld dort losse. Bloß weil
mir net brav warn, hadda sich misse so uffreeche. Also: mir gonz allää sinn
schuld. Des hadda aa em Papscht gsaat, wiera dodeletscht beim war. Un

jetzat männda, mir kännde jo widda gut mim sinn. Ich deet saa, do missda
awwa erscht, wie sellemols de Hoinrich de Vierde, noo Canossa – in dem Fall
Berlin – schlabbe. Un beim Recep E. geht ma ́s genauso wie beim Donald un
beim Jong-Un, wie e friehjera Kolleech gsaat hat, wo jetzat in Zwääbrigge bei
de Schdaatsonwaltschaft is: „Denne do trau ich grad so weit, wie ich e Klavier
schmeiße konn!“ Ach, zu dem Trio komma iwwrichens aa noch denne
Waldemar Truthinggel – russisch: Wladimir Putin – nemme, so dass des e
schäänes Barraawa-Quartett gebbt.
Un schun simma in Deitschlond ookumm, wo e gewissi
Onschela M. aus B.

wobei „B“ net fa Buseberch odda Bärmesäns schdeht. Es Onschela werd in
Inseiderkreise aa „Wildi Hummel“ gehääß wää ihrm iwwaschäumende
Temprament un ihrm uubändiche Hong zu schnelle Entschliss. Abwaade
odda Aussitze is net ihr Ding. Alladings is ihr MHD schun e Weil abgeloff. Des
honn ich dodeletscht dodroo gemerkt, dass irchend so e Schdaatssekredärin
e Hosseoozuch oogehatt hat, wo ausgsieh hat, als wonnse änna vum
Onschela soine abgeleede ufftraa deet. Vielleicht roomt ́s Onschela schun
so longsom soi Schränk aus. Uff de onna Seit werd ihr Joggl dehääm froh
sinn, wonn se noch e Weil dehääm aus de Fieß is un kää Dorchnonna macht.
Es konn jo aa sinn, dasses ihm uff de Sack geht, wonn ́s Onschela alle
Gebott zum saat: „Joachim, wir schaffen das!“ Awwa er konn des doch net
gonz Deitschlond bieße losse! Alla Joggl, guck, dasses dehääm bleibt!
Bei dere Trubbe mit abgeloffnem MHD homma aa noch de
Horscht, de
Zwoggl-Goggl
aa „Seine Scheinheilichkeit Horstus Primus Bavariae“ genonnt
(vun Bavaria is glaawich aa der Ausdruck Barraawa abgeleit). Denne misse
irchendwonn emol e paar Außairdische entfiehrt honn mit Gehirnwesch un so.
Obwohl, bei so bissl Gehirn is ma mim Wesche glei ferdich. Awwa seitdem
glaabt der Barraawa, Bayern wär de Middlpunkt vun dere Welt. Dass des net

schdimmt, sieht ma allää schun dodroo, dass soi sogenonnde
Chrischtsozjale, die weda chrischtlich noch sozjal sinn, bei de letschde Wahl
dermaße änni uf de Sack krieht honn, wie sunscht kää Paddei. Awwa donn
noch große Teen schbauze. Außadem wääß jo aa jeda, dass die Weltachs in
de Palz geschmiert werd un net im Zwoggllond. Jetzat geht er jo widda noo
Berlin un werd als Zwoggl-Goggl widda de Berlina Hinkel norenne. ́S werd
net long dauere, bis änns vun denne e Ei vum erwaat un e Zwoggl-Küke
krieht. Des Mudda Hinkel werd donn widda e Regierungsdirektoreposchde in
ännra Bundesbehörde krieh. Des is so e Art bayrischi Frischdelösung.
Wenne homma donn do noch? De
Alexander D.aus M.
War die gonz Zeit
Minischda fa Vekehr un Digidali Infraschdrukdur. In soim Minischderium
hadda aa „Pannen-Alex“ gehääß. Er is e Muschda on Zuvelässichkeit, weil
grundsätzlich gar nix, was er in die Finga nemmt, funktzjoniert. Un dodruff
komma sich velosse. Hat sich mit soina Bemerkung zum
„Zwercheuffschdond“ e bissl weit ausem Fenschda gelehnt. Hedda mol
seerscht soi eichne Wahlergebnisse oogeguckt, hedda bessa ́s Maul gehall.
Will schun seit Johre mit de große Hunde brunze gehje, bringt awwa trotz
intensieva Gimnaschdigg ́s Bää net hoch genunk.
Ou, do homma jetzat es Super-Model
Chrissi L.
vun de Ferzbeidel un
Dummbabbla Paddei (FDP) uffem Zeddl. Hat erscht große Teen gschbauzt,
hat wochelong „sondiert“, un wiera gemerkt hat, das es Lääwe ääwe kää
Ponyhof is un dasses e großa Unnaschied zwische digge Ärm mache un
Veontwordung iwwanemme gebbt, hadda vor Ongscht in die Hosse gschiss.
Bollidigg is ääwe die Kunscht der Kompromisse un der Diplomatie – un die
Kunscht beherrscht ääwe net jeda. Odda wie hat die alt Queen-Mum mol
gsaat: „Diplomatie ist den Kuchen so zu teilen, dass das Gegenüber mit den
Krümeln höchst zufrieden ist.“

Jetzat kumme ma zum Achdabohnmonn von de Genosse:
Martin S. aus W.
Is mit 100 % gschdart un iwwa äämol isses dermaße nunnazus gong, dasses
de Rode sosesaa schwarz vor de Aue woor is. Ehrlich gsaat, er duut ma
dessentwää lääd un des hadda aa net vedient. Un ́s is ma vorkumm, wie
wonn se em Martin e Bungee-Sääl um de Bauch gebunn hedde, donn isser
vun de 100 %-Brick gehuppst bzw. geschdumpt woor un wiera grad gonz
unne war, honnsem es Sääl dorchgeschnitt, bevor er hat känne widda
serickschnerre. Monche werfem vor, er wär umgfall un donn doch in GroKo-
Geschbräche gong. Dodezu saa ich bloß änns: Nur e Bleeda beharrt
schdurkobbich uff dem, wassa mol gsaat hat, wonn sich zwischezeidlich die
Umschdänd geännat honn. Des bringt net jeda ferdich – siehje aa „Chrissie
L.“ Un jetzat schdeht er do mit leere Hänn, veheizt un fruschdriert. Als Wähla
froo ich mich do: wonn die Paddei mit ihre Leit schun so umgeht, wie geht se
donn mit em Wahlvolk um? Wonn donn noch gsaat werd, es ging seallaerscht
um „Inhalde“, donn denkt der Wähla: jo, seaalaerscht um de Inhalt vun jedem
äänzelne soim Geldbeidel. Em ää odda de onna meecht ich noch änns ins
Schdammbuch schreiwe, wie des Johannes XXIII. mol gsaat hat: „Nimm dich
nicht so wichtig, Giovanni!“
Die Andrea N. aus W.
(„W“ schdeht net fa Winzle, es schdeht fa Weiler), aa
„Die Nervesää vun de EsPeDee“ genonnt, soll jetzat die Nachfolcherin vun
dem Vorsitzende mit dem korze Vefallsdatum werre, was jo awwa aa widda
einiche net basst. No 153 Johr es erschde Mol e Fraa als Owwagenossin,
des wär schun ebbes. Ob se die SPD uff e neijer/alda Kurs bringt, bisses
quietscht odda wonn ́s aa quietscht? Ich winschre dodebei viel Fortün un
Fingaschbitzegfiehl. Unsam Lond deet e großi Bortzjohn mehr
sozialdemokradisches Herz wie schunnemol bei Brandt un Schmidt aarich
gut duu, selbscht wonn bei de Andrea die Teen lauda sinn wie sellemols beim
Willi un beim Helmut. Ää wichdicha Schbruch vum Ludwig Sebus, ännre

Kölner Karnevalslegende, geb ich rer awwa mit uff de Weg: „Wirklich
bedeutende Menschen sind immer 'Mensch'“!
Als nechschdes honn ich de Juso-Jungfuzzi
Kevin K. aus B.
uffem Zeddl, der
wo mit Hilfe vun Kurzzeitmitgliedschafde sich so eichene Mehrheide baschdle
will. No moina Uffassung e bissl e eichnes Veschdändnis vun Demokradie.
Na ja, ich will emol so saa: wonn änna schun Kevin hääßt... Des is awwa
vielleicht aa de Zeitgeischt, ́s werd fascht alles nur noch als „Projekt“
gemach. Chöre beischbielsweis suche vezweifelt Sängarinne un Sänga, wo
alle Woch in die Singschdunn kumme. Wonn awwa e Chorprojekt geplont is,
wonn ́s geht mit irchendäm bleede englische Nome, donn gehje se bei,
bisses Projekt rum is. Hauptsach, kää dauerhafdi Vepflichdung ingehje. So
geht’s aa mit Theadaprojekde, Benfizprojekde. Uff de onna Seit muss ma jo
zugewwe: Bollidigg is eichentlich nix onnres wie ää Projekt noom onnre.
Awwa ́s misse imma e paar do sinn, wo de Lade zommehalde, imma, net
bloß als Projekt.
Moi gonz schbezjelli Freundin honn ich jetzat im Visier.
Julia K. aus G.
́S is
net, wie de Heino gsung hat, die schwarze Barbara, ́s is die schwarze Julia.
Doch, es gebbt schun Sache, wo se konn. Woikeenichin zum Beischbiel.
Awwa ich glaab, des war ́s schun. Womma bei ihre uff ihr Paddei-
zugeheerichkeit vetraut un bei ihre e chrischtlichi Gesinnung sucht, werd ma
schnell gewahr, dass des e Edikeddeschwindel is. Sie hat sich aa,
wahrschoinz bedingt dorch ihr Zeit als Woikeenichin, schun imma fa was
bessres gehall un des aa schun imma wie e Monschdranz vor sich hergetraa.
Wonn jemonnde so ingebildt is, des kummt bei uns Pälza iwwahaupt net gut
oo. Dessentwää bringt die bei uns aa kää Bää uff de Bodde – un des is aa
gut so! Vielleicht konn se in Berlin als Londwirtschaftsminischdan die Nas
hoch draa, ohne dass sich änns droo schdeert, moinetwää, die Berlina sinn jo

einiches gewähnt.
Eichentlich wollt ich zu dere schbezjelle Sort vun Barraawa nix saa, jetzat will
ich zu äm vun denne doch e korzes Wort veliere, schunsch gehda vors
Vefassungsgericht mit ännra Beschwerde, weil ich ne beim Bollidigga-
Bäsching iwwagong hett. Vun wem die Redd is? Vum
Uwe J. aus M.
War
Owwerschdleitnant bei de Bundeswehr (Besoldungsgrupp A 15) un misst aus
dere Zeit jo e bissl abgehärt sinn. Issa awwa net, er is mehr so e Prinzessje,
wie die meischde vun soine Paddeikolleechinne un Kolleeche. Die känne
bloß gut ausdääle, wonn ́s Echo donn reduur kummt, werd gepienzt. Un
gejommat werd aa, ma hett des jo gar net so gemännt, wie des vun de
Lügenpresse vebräät woor wär, die hedde alles falsch veschdonn. Ihr AfD-
Fuzzies, ich gebb eich do gonz fa umme e guuda Root mit: Es is nie
wichdich, was ich saa, wichdich is des, was der onna veschdeht! Un
Demograddie is net Befehl un Gehorsam, des is e bissl komplizierda, do
brauch ma e bissl Grips im Kopp. Ich wääß aa net, awwa irchendwie denk ich
bei eich imma on die Nena mit de 99 Luftballone. Die sinn sosesaa e Symbol
fa eier Fiehrungsriege: 99 uffgeblosne Type mit nix im Kopp wie Luft!
Jetzat kumme ma in die Heimat.
Bernhard M. aus P
. hat do die Daa beim
Franziskus de Ootraach uff Heilichschbrechung geschdellt. Die
Selichschbrechung kännt ma jo iwwahuppse, weil ́s jo in Rodalwe schun e
Kerch „Selicha Bernhard von Baden“ gäb, des deet jo basse. Außadem deet
er aa imma somschdags bade. De Franziskus hat gemännt, es Bernie-
Bärche wär schoinz lätz, weil selich odda heilch kännt ma erscht werre,
womma de Leffel abgebb hett, also doot wär. Er hett zwar e Temprament wie
e Dooda, awwa trotzdem deet er noch lääwe. In soim Fall kännt er ne bloß
schoinheilich schbreche. Ach, un ́s Bernie-Bärche liebt jo ́s Ausbriede vun
Vorschlääch im gonz klänne Kreis, die offene Kommunikatzjohn is net so

soins. Des honn ich zwar letschtjohr aa schun gsaat, awwa ́s hat sich net
gebessat, eher veschlechdat. Er hat awwa e guudes selektives Gedächtnis.
Ideeje vun onnre heert er, hääßt se irrational un net dorchfiehrbar. Awwa er
merkt se sich so gut, dassa se e halb Johr schbeeda als eichne Subba-Ideeje
in de Ring schmeißt. Onschdatts Scheinheiliger Bernhard deet ma bessa
Bernhard, der Plagiator odda aa „Muddi vun Bärmesäns“ zum saa. Awwa so
sinn se, die Schwarze! Ach, zum Plagiator basst aa noch, dass die Schwarze
desjohr aa polidischa Aschamittwoch mache – alde Noomacha!
Ei guggemol do, do hat sich jo noch änna uff moim Schriftschdigg
veschdeggelt:
Gerd H. aus P.
! Er is e absoluda Schbetzjalischt, wonn ́s drum
geht, braune Rotzleffel aus de Reserve se logge. Do kännt er jo vielleicht
Seminare fa Londdaas- un Bundesdaasabgeordnede oobiede: „Von 0 auf 180
– wie ich braunes Gesocks mit Blitzstart aus der Fassung bringe.“ Weil des
mit Bojemääschda werre jo net geklappt hat, wär des e schäänes neijes
Awweitsgebiet, odda net? Un des deet Bärmesäns gewaldich uffwerde.
Friehja, wie noch Poesiealbe modern warn, hat ́s imma irchendänns gebb,
wo uff die letscht Seit gschribb hat: „Ich hab mich hinten angewurzelt, dass
niemand aus dem Album purzelt!“ Wer wääß des noch? Ans Enn vun moim
heidiche Bollidigga-Album häng ich jetzat noch e junga Genosse, denne wo
ma polidisch noch gut fiedere misse, as dassa e Schwergewicht werre konn.
Un was Schwergewicht oogeht, do känne sich de Gerd un ich gut aus, gell
Gerd? Die Redd is vum
Sebastian T. aus W.
Letschtjohr honn ich gsaat, er
deet schnella redde wie de Schall – des war als schun dehääm so. Der hat
zwää greeßre Gschwischda, wonna do ebbes saa wollt, hadda misse schnell
sinn. So hadda halt dränniert. Ergebnis: Bis soi Gschwischda ́s Maul
uffgemach gehatt honn, wara schun mit soim Satz ferdich. War als Kind
schun e Gerechtichkeitsfänn, hat schun als Vierjähricha im Urlaub zwää

Ongla oogemotzt, weil do Ongle vebott war. Is ehrgeizich un is mit Recht
schdolz druff, dassas, obwohl er jinga is, schun weida gebrung hat wie soi
zwää schwarze Kussäng.
So, jetzat longt ́s, ich klapp es Album zu bis Nechschdjohr. In dere Zeit werd
noch viel bassiere, hoffentlich mehr Gudes wie Schlechdes fa Schdadt, Lond,
Bund un die Welt. Uff jeden Fall werre genunk debei sinn, mit denne wo ich
nunna on de Eisweiher gehje konn, um se dorch de Kakao se ziehje!
Bevor ich mich vum Acker mach, noch e Fraach: Wie schdellt ma fescht, dass
Integration erfolgreich war? Wann ́s muslimische Kind ausem kaddolische
Kinnagaade kummt un saat: „Jesses nää, Mama, du hasch schun widda ́s
Essegeld vegess, dodebei hat ́s heit moi Lieblingsesse gebb: grobi
Brotworscht, Schdambes un Sauerkraut!“
Alla donn!